Нов Зеланд на почетокот на декември ќе го прекине тримесечниот карантин на најголемиот град во земјата Окленд и ќе усвои нова стратегија за борба против корона вирусот, изјави денеска премиерката Јасинда Ардерн, пренесува Бета, повикувајќи се на АФП.
Премиерката рече дека од 23.59 часот на 2 декември, Нов Зеланд ќе започне со примена на нови методи за борба против КОВИД 19 и ќе се обиде да го потисне делта сојот на вирусот наместо да се обидува целосно да го елиминира.
„Тешката вистина е дека видот делта е таму и не е подготвен да исчезне. Иако ниту една земја не успеа целосно да го елиминира видот делта, Нов Зеланд е во подобра позиција од повеќето други да се справи со тоа“, рече таа.
Досега, нејзината влада се обидуваше целосно да го елиминира вирусот, спроведувајќи ја таканаречената политика за нулта COVID, со строги мерки за заклучување, ригорозно следење контакти и строга контрола на границите.
Новиот систем, кој не предвидува заклучувања, беше претставен како семафорски систем.
Зелената значи дека нема да има контроли за вирусот, портокаловата значи дека маската се носи на некои места, а црвената дозволува продавниците да бидат отворени само за вакцинирани клиенти со неопходното почитување на физичката дистанца.
Коронавирусот уби 40 луѓе во Нов Зеланд, кој има пет милиони жители, но се засили притисокот да се стави крај на карантинот воведен во Окленд од август, кога беше откриен видот делта.
Ардерн прво предвиде дека ќе ја промени политиката кога стапката на вакцинација ќе достигне 90 проценти во државата, но на крајот го помести повторното отворање на градот со сегашната стапка на вакцинација од приближно 83 проценти.
Премиерката рече дека Окленд прво ќе биде во црвената категорија, додавајќи дека властите сè уште ги рангираат другите зони.
Окленд сега е изолиран од остатокот на Нов Зеланд, а блокадите на патиштата треба да бидат отстранети на 15 декември.
Строгите прописи за меѓународните пристигнувања остануваат на сила, рече Ардерн, најавувајќи дека ќе ги олесни на почетокот на следната година.