Во кружната сала на зградата на поранешни општествено-политички организации, Комитет утре ќе се одржи деветта седница на Советот на Општина Куманово. Вкупно за разгледување има 53 точки. На дневен ред ќе се најдат финансиските и извештаите за работа на јавните претпријатија Пазаришта, Куманово паркинг, Водовод, Чистота и Зеленило, како и годишните планови за вработување во истите.
Советниците ќе расправаат и за предлог одлука за основање на ново јавно претпријатие за просторни и урбанистички планови Куманово-план, предлог одлука за организација, делокругот и начинот на извршување на задачите на општинската администрација, предлог одлука за измена на распоред на средства на буџетот за 2018-та како и проширување на истите средства.
Тие ќе ја разгледаат и предлог-измената и дополнување на Планот на програми за развој на Општина Куманово, предлог – Програма за изменување и дополнување на Програмата за уредување на градежно земјиште, изградба и одржување на комунална инфраструктура. На дневен ред ќе се најдат и извештајот за реализација на Програмата за развој на спортот и рекреативни активности на граѓаните во Општина Куманово за 2017 година со финансов извештај, годишниот извештај за реализирана Програма за јавно здравје, извештајот за работењето на Центарот за развој на Североисточниот плански регион за 2017 година со финансов извештај.
Советниците ќе ги разгледаат и предлог – Одлука за зголемување на основната главнина на Јавното претпријатие за изградба на инфраструктурни објекти “Куманово – гас, предлог – Одлука за утврдување на цена на влезници и начин на користење на тениски терени „23-ти Октомври“, предлог-одлука за изменување и дополнување на Одлуката за утврдување на висината на надоместокот за обезбедување на финансиски средства за изградба, реконструкција, одржување и заштита на општинските патишта и улици.
На дневен ред се и предлог одлуки за вработување за 2018-та но и 2019-та во градинката Ангел Шајче, домот за стари лица Зафир Сајто, библиотека Тане Георгиевски, предлог одлука за именување на командант и членови на Штаб за заштита и спасување, како и предлог – Одлука за изменување на Одлуката за формирање на Комисија за процена и утврдување на висината на штетата од природни непогоди и други несреќи на подрачјето на Општина Куманово.
Утре ќе се расправа и за предлог – Одлука за ослободување од плаќање на надоместок за уредување на градежно земјиште за градење на верски објект на Македонска православна црква – Охридска архиепископија – Скопје, Кумановско-Осоговска Епархија, како и предлог одлуки за давање согласност за апликација и реализација на неколку проекти на библиотеката Тане Георгиевски и Фондацијата за кулутра и спорт, како и носење на неколку детални урбанистички планови. Седницата која ќе започне во 10 часот, може да ја следите директно на Телевизија Плус.