Израелските изборни претставници денеска ги пребројуваат последните гласови од парламентарните избори во вторник, а поранешниот премиер Бенјамин Нетанјаху се очекува да се врати на власт благодарение на поддршката на екстремно десничарските сојузници.
Сè уште е можно изненадување во последен момент доколку малата левичарска партија Мерец успее да го помине изборниот праг, да влезе во парламентот и да го намали мнозинството на Нетанјаху.
Сепак, шансите се мали и се верува дека сојузниците на Нетанјаху веќе се договараат за министерските ресори во она што ќе биде најдесничарската влада во историјата на Израел.
Преброени се повеќе од 90 отсто од гласовите, а конечните резултати би можеле да бидат објавени денеска.
Нетанјаху и неговите сојузници, партиите на ултранационалистите и ултраортодоксните Евреи, очекуваат да имаат 65 пратенички мандати, од вкупно 120 во израелскиот парламент, Кнесетот.
Неговите противници, предводени од претседателот на привремената влада Јаир Лапид, ќе имаат 50 пратеници.
Очекуваната победа на Нетанјаху и стабилното мнозинство ќе стави крај на политичката криза во Израел, барем засега.
Израелците, сепак, ќе продолжат да бидат поделени околу нивното лидерство и вредностите што ја дефинираат нивната држава, без разлика дали е еврејска, демократска или и двете.
Врз основа на 93 проценти од преброените гласови, конзервативната Ликуд на Нетанјаху ќе има 32 пратеници.
Централната партија на Лапид Има иднина (Јеш Атид) има 24 пратеници, ултрадесничарскиот Религиозен ционизам 14, централно-десничарската Национално единство 12, верската партија Шас 11 и Обединетата Тора јудаизам осум.
Арапската партија Раам ќе има пет пратеници, а исто толку арапската партија Хадаш-Тал, додека централно-левичарската Лабуристичка партија ќе има четири пратеници.
По официјалното објавување на резултатите, претседателот назначува еден кандидат, обично од најголемата партија, за да формира влада во рок од четири недели.