Шпанскиот премиер Педро Санчез го осуди „неселективното убиство на Палестинците“ за време на посета на границата на Појасот Газа, предизвикувајќи лут одговор од Израел, кој тврди дека таквите изјави го поттикнуваат тероризмот.
За време на турнејата со белгискиот премиер Александре Де Кроа на преминот Рафа, кој е под контрола на Египет, Санчез, исто така, повика на постојан хуманитарен прекин на огнот во Газа „за да се промени катастрофалната ситуација низ која минуваат луѓето од Појасот Газа“.
„Недискриминирачкото убивање на невини цивили, вклучително и илјадници момчиња и девојчиња, е целосно неприфатливо“, рече тој, според Ројтерс.
Израелскиот министер за надворешни работи Ели Коен ги обвини Санчез и Де Кроа за „лажни тврдења“ кои „го охрабруваат тероризмот“ и рече дека ги повикал амбасадорите на Шпанија и Белгија за да ги разјаснат коментарите.
Се огласи и израелскиот премиер Бенјамин Нетанјаху, велејќи дека двајцата европски лидери не успеале да се осврнат на злосторствата против човештвото извршени од палестинските милитанти на Хамас.
„Нетанјаху силно ги осудува забелешките на белгискиот и шпанскиот премиер дека не сносат целосна одговорност за злосторствата против човештвото извршени од Хамас, кои масакрираа наши граѓани и кои ги користат Палестинците како жив штит“, соопшти кабинетот на премиерот.
Двајцата европски премиери остро ги осудија нападите на Хамас на 7 октомври, но беа и најгласните лидери на ЕУ во однос на потребата од прекин на огнот и почитување на човековите права во Газа, пренесува Танјуг.
Набргу по коментарите на Нетанјаху, шпанскиот министер за надворешни работи Хозе Мануел Албарес во видео изјава рече дека „обвинувањата на израелската влада се лажни и неприфатливи“.
„Ние категорично ги отфрламе“, рече тој.
Подоцна вечерва Албарес на државната телевизија изјави дека го повикал израелскиот амбасадор во Мадрид за да ги објасни обвинувањата на израелската влада.