Портпаролот на рускиот претседател Дмитриј Песков изјави дека Москва ја поддржува Србија во ситуацијата околу Косово и дека барањата на властите во регионот до Србите кои живеат на север се неосновани.
– Се разбира, ние апсолутно ја поддржуваме Србија. Блиски сме со косовските Срби. Сметаме дека тоа (барањата на косовските власти) се апсолутно неразумни барања – изјави портпаролот на Кремљ.
Според него, западните земји кои ја признале независноста на Косово мора да ги предупредат покраинските власти на непромислени чекори, а правата на Србите кои живеат таму мора да се почитуваат.
– Се разбира, ние веруваме дека оние земји кои го признаа Косово и беа гаранти треба да го искористат сето свое влијание за да ги предупредат косовските власти да не преземаат никакви непромислени чекори кои би можеле да доведат до дополнителна ескалација на тензиите – рече тој.
– Бараме да се почитуваат сите права на Србите – нагласи Песков.
Тој додаде дека влошувањето на конфликтот меѓу Косово и Србија успеало да се избегне и дека ситуацијата е одложена за еден месец.
– Сега, фала богу, избегнато е одредено влошување во текот на ноќта, но ситуацијата е одложена само за еден месец, па затоа е многу важно да се покаже претпазливост од сите страни – им рекол Песков на новинарите, пренесува Спутник.