Во Шефилд, Англија, едно семејство се зголеми за четири члена за време на пандемија на коронавирус.
Џесика Причард (31) била двапати бремена за време на пандемијата – првиот пат кога добила ќерка, Миа, а потоа дознала дека очекува тројки.
– Беа вртоглави 12 месеци, имав дете за време на рестриктивните мерки, а потоа уште три бебиња – изјави Причард, која работи во локалното основно училиште, пренесува New York Post.
Иако вели дека претходните 12 месеци биле исцрпувачки за неа и нејзиниот сопруг Хари (34), таа посочува дека тие се „среќни и благословени“ со детската радост.
Додека била на породилно отсуство, откако Миа се родила во мај 2020 година, Џесика во октомври дознала дека е бремена и набргу потоа дека чека тројки.
– Ми кажаа на ултразвук дека ќе родам близнаци и тоа доста ме шокираше. Тогаш докторот продолжи да погледа поубаво и ми рече дека всушност носам три бебиња. Се прашував како е тоа можно и едвај чекав да се вратам дома за да му кажам на сопругот. Отпрвин не веруваше, а потоа почна да се радува како никогаш досега во својот живот – рекла Џесика.
Двојката има уште едно дете-осумгодишната Моли, а трите новородени бебиња се викаат Ела, Џорџ и Оливија.