Поглед во камерата и вратата ви се отвора. Патувањето со московското метро сега е едноставно исто како да го покажете вашето лице – барем за оние кои аплицирале да платат билети користејќи препознавање лице.
Со апликацијата MosMetro, сега можете да се регистрирате за овој начин на плаќање без контакт користејќи фотографија на лице и банкарска картичка.
Повеќе од 25.000 луѓе веќе го користеле овој метод првиот ден, објави државната транспортна компанија во руската престолнина во саботата.
„Нашите очекувања се надминати“, рече Максим Ликсутов, заменик – градоначалник задолжен за сообраќај.
Контроверзната технологија е тестирана од почетокот на годината.
„За да влезат во метрото, на патниците не им треба картичка или паметен телефон – тие само треба да ја погледнат камерата на влезот“, објасни Ликсутов.
Системот сега работи на повеќе од 240 метро станици во најголемата европска метропола.
За да го користат, патниците мора да ја депонираат својата фотографија, банкарска картичка и картичка за патување со воз и автобус и да ги поврзат со апликацијата за метро.
„Москва е првиот град во светот каде системот функционира до овој степен“, рече заменик -градоначалникот.
Тој очекува начинот на плаќање, наречен Face Pay, да го користат 10 до 15 проценти од патниците во следните две до три години.
– Безбедно е и може да се користи дури и кога носите маски за лице, велат властите.
Независната организација Роскомсвобода, од друга страна, предупреди дека тврдењата за безбедноста на системот се „доста сомнителни“ и дека личните податоци може да завршат во рацете на безбедносните служби.