Новиот шведски премиер Улф Кристерсон ја претстави коалициската влада на десниот центар во парламентот, ветувајќи дека ќе го промени курсот за имиграциската и енергетската политика и кривичната правда.
Малцинската влада на Кристерсон, која парламентот вчера ја избра за премиер, ја сочинуваат неговата Умерена партија, Демохристијаните и Либералите, а извршната власт е поддржана од антиимиграциската партија Шведски демократи, која претходно имаше екстремно десничарски позиции.
Новата влада претставува остар пресврт надесно за земјата каде што левиот центар Шведската социјалдемократска работничка партија беше на власт во последните осум години.
Кристерсон денеска пред пратениците вети преиспитување на кривичниот законик и пошироки овластувања на полицијата во борбата против криминалните банди, кои во последните години станаа помоќни и насилни.
„Ниту една друга земја во цела Европа нема тренд на насилство како Шведска, со 53 фатални престрелки од почетокот на годината. Владата сега ја започнува најголемата офанзива против организираниот криминал во шведската историја“, рече 58-годишниот Кристерсон.
Тој, исто така, вети „промена на парадигмата“ во имиграциската политика, означувајќи го дефинитивниот крај на децениската либерална имиграциска политика, чие заострување веќе започна за време на претходната социјалдемократска влада.
Тој изјави дека имиграцијата во Шведска станала „неодржлива“ и додаде дека тоа резултирало со лоша интеграција, невработеност, несигурност и други проблеми.
Околу 20 отсто од 10-те милиони жители на Шведска се родени во странство, а многу од нив се бегалци од земјите зафатени од војна, вклучувајќи ги Сирија, Ирак, Авганистан и Сомалија.
Ставовите кон имиграцијата станаа потешки во Шведска во последниве години, што придонесе за подемот на партијата Шведски демократи, која, благодарение на поддршката од кабинетот на Кристерсон, ќе може да влијае на владината политика во области како што се имиграцијата и правдата.
Од друга страна, опозициските политичари од левиот центар ја обвинуваат коалицијата на Кристерсон дека го поткопува меѓународниот углед на Шведска како толерантна и гостопримлива нација.
Кога станува збор за енергијата, Кристерсон навести зголемување на употребата на нуклеарна енергија, за разлика од претходните влади кои се обидоа да ја прекинат нејзината употреба.
Новиот премиер рече дека целта за производство на електрична енергија ќе биде променета од „100 отсто обновливи извори на енергија“ на „100 отсто без фосилни горива“, оставајќи простор за нуклеарна енергија.
Кристерсон ги поддржува напорите на Шведска и соседна Финска да станат членки на НАТО.
Тој денеска рече дека неговата влада ќе се држи до договорот што претходно го постигна со Турција, за прекин на поддршката за курдските групи кои Анкара ги обвинува за тероризам.
Како услов за прифаќање на влезот на Шведска и Финска во НАТО, Турција постави конфронтација со припадниците на курдските групи кои живеат во нордиските земји.
Во новата влада на Шведска има 24 министри, од кои 13 се од Умерената партија, шест од Демохристијаните и пет од Либералите.
Министер за надворешни работи е шефот на пратеничката група на Умерената партија, Тобијас Билстром.
Лидерот на демохристијаните Еба Буш беше назначен за министер за енергетика, додека 25-годишната функционерка на Либералната партија Ромина Пурмоктари влезе во историјата како најмладиот министер во шведската влада. Таа ќе раководи со одделението за клима и животна средина.
На изборите на 11 септември, Умерената партија беше трета со 19,1 отсто од гласовите, демохристијаните освоија 5,3 отсто, а либералите 4,6 отсто.
Второто место го зазедоа шведските демократи со 20,5 отсто од гласовите, додека сега опозициските социјалдемократи беа убедливо први со 30,3 отсто од гласовите.