Вкупно 260 деца се родиле во првото тримесечје од почетокот на оваа година на подрачјето на Општина Куманово, објави Државниот завод за статистика, што е за 50 помалку во споредба со истиот период минатата година.
Помал е и бројот на починати споредбено со првите три месеци од минатата година. Ако во 2017 бројката на починати во првото тримесечје изнесувала 307, оваа година бројката изнесува 298 лица, меѓу кои и едно доенче.
Природниот прираст за првите три месеци од 2018 година за Куманово е негативен, односно -38.
Пораст годинава се бележи и на бројот на новосколучени бракови и разводи. Ако лани во јануари, февруари и март биле склучени 93 бракови, а разведени 13, годинава 103 парови стапиле во брак, а 24 парови ставиле крај на својот брачен живот.
На ниво на државата бројот на живородените деца во првото тримесечје од 2018 година, во споредба со истиот период од претходната година, е намален за 1.6 % и изнесува 5 255 живородени деца. Бројот на умрените лица во првото тримесечје од 2018 година бележи намалување од 11.4 % во споредба со истото тримесечје од 2017 година и изнесува 5 432 лицa, а од нив 22 се умрени доенчиња. Природниот прираст изнесува -177, што значи за толку лица е помал бројот на живородените деца од бројот на умрените лица. Бројот на склучените бракови во ова тримесечје од годината е намален за 1.3 % во споредба со истиот период од 2017 година и изнесува 2 532 бракови. Во ова тримесечје се добиени 520 извештаи за разведените бракови.