Земјите-членки на НАТО почнаа да обезбедуваат итна помош за сојузничката Словенија погодена од поплавите.
Генералниот секретар на НАТО Јенс Столтенберг во телефонски разговор со словенечкиот премиер Роберт Голоб изрази сочувство и силна солидарност на НАТО со Словенија.
„Го поздравувам фактот што сојузниците на НАТО ги зголемија понудите за поддршка, вклучувајќи хеликоптери, модуларни мостови, багери и инженерска експертиза“, рече Столтенберг.
Силни поплави за време на викендот погодија две третини од Словенија, при што загинаа најмалку шест лица, а стотици останаа без покрив над главата.
На барање на Словенија за помош преку Евроатлантскиот координативен центар за одговор при катастрофи на НАТО (EADRCC), Шпанија понуди тежок хеликоптер CH-47 со најмногу 25 лица, вклучувајќи екипаж и персонал за поддршка.
Сојузниците на НАТО обезбедуваат поддршка преку Европската унија и билатерално. Поддршка понудија и Бугарија, Хрватска, Германија и Франција.
САД , исто така, распоредија релевантен персонал во Љубљана за да ја проценат ситуацијата и да ги утврдат итните хуманитарни потреби.