Микро и малите претпријатија од Куманово бараат помош од општината

Сподели со своите пријатели

Микро и малите претпријатија во Куманово кои имаат до 10 вработени бараат помош од локалната самоуправа со цел надминување на кризата која настана со воведувањто на вонредната состојба и појавата на коронавирусот.

Loading...

Вкупно 113 фирми од Кумановопреку писмо до градоначалникот Максим Димитриевски упатуваат барања за помош, како Ослободување од плаќање на Комунална такса за 2020 год и отпишување на долгот за 2019, замрзнување на доспеани и нови долгови кон Јавните претпријатија основани од Општина Куманово додека трае кризата и еднократна  парична помош во износ од 1000 евра.

Димитриевски пред неколку дена на својот Фејсбук профил најави помош за угостителите и рече дека во следниот период локалната самоуправа ќе излезе со социо-економскиот совет и со други мерки за помош на останатите стопански гранки.

-Сакам да ги известам сите угостители во градот дека поради губитоците кои ги имаат од неработењето на угостителските локали и евидентните загуби кои што ги трпат на првата следна седница на советот ќе излезам со барање до Советот на општината да донесе одлука за ослободување од плаќање за надомест за поставување на урбана опрема, столови и маси и закуп на јавни површини. Ќе заврши кризава и ќе продолжиме да функционираме нормално да се дружиме сите во ваши угостителските објекти, напиша Димитриевски.

Во продолжение и интегралното писмо кое го потпишаа 113 компании:

                Ние како мали или микро претпријатија кои најчесто бројат до 10 вработени и како правни субјекти од најразлични гранки, почнувајќи од бутици, книжари, фризерски и козметички салони, школи за странски јазици, игротеки, автоперални и останати не опфатени во ниту едно здружение или посебна Комора би сакале на овој начин да ги искажеме нашите барања и да ја информираме јавноста. 

Сите ние без разлика на дејноста која што ја извршуваме во изминатиот месец и претстојниот период не сме во можност да ги плаќаме нашите обврски. Се разбира тука спаѓаат кирии, плати на вработени, режиски трошоци а кај многу од нас и рати за кредити.

Некои од нас како што се центрите за странски јазици, теретани, спортски клубови и др.  со одлука на Владата, а како мерка за заштита од ширење на новиот Корона вирус (Sars-Cov19) на ден 11.03.2020 престанавме со извршување на нашата дејност обука во училници и останати затворени простории. Останатите од истите причини или поради намалување на обемот на работата и дополнително создавање на трошоци како што се трошоци за затоплување, одржување на хигиена, дезинфекција беа принудени да ги затворат своите објекти. Со тоа сите наши приходи престанаа или значително се намалија, а останатите тековни прошоци како и плати за вработените продолжија да течат.

Loading...

Имајќи ја во предвид неизвесноста во моментот и случувањата со ширењето на вирусот и прогласувањето на вонредна состојба доколку не добиеме финансиска помош ќе бидеме приморани да ги затвориме своите фирми. Со тоа повеќе од 500 вработени и нивните семејства ќе бидат доведени на работ на преживување  со оглед  и на фактот дека на многумина им е семеен бизнис или единствен начин на приходи и егзистенција. Сите овие фирми освен егзистенција на голем број на семејства редовно си ги подмируваат сите обврски кон државата и другите институции.

                Согледувајќи ја моменталната состојба и неможноста за подмирување на нашите доспеани долгови, а и долговите кои ќе настанат во периодот што следи доколку не добиеме никаква помош ќе мораме да ги отпуштиме нашите вработени како прва мерка,а после тоа би следело наше понатамошно задолжување и на крај затворање на фирмите.

Се надеваме дека ќе наидеме на разбирање и ќе ни помогнете во овој период кој е навистина тежок како за државата така и за нас како правни субјекти и со тоа би успеале да се справиме со настанатата финасиска криза и би продолжиле со својата дејност и редовно подмирување на сите обврски како и досега и по завршување на кризата.

Имајќи ги во предвид горе наведените причини и проблеми нашите барања се:

–              Ослободување од плаќање на Комунална такса за 2020 год и отпишување на долгот за 2019.

–              Замрзнување на доспеани и нови долгови кон Јавните претпријатија основани од Општина Куманово додека трае кризата.

–              Еднократна  парична помош во износ од 1000 евра.

Никола Ивановски

Loading...

Leave a Reply