Францускиот претседател Емануел Макрон сака контроверзната пензиска реформа да стапи на сила до крајот на годината.
Според анкетите во Франција, до 70 отсто од луѓето ја отфрлаат таа реформа.
Рејтингот на политиката на претседателот е најнизок во последните неколку години – само 28 отсто од гласачите го одобруваат.
Сепак, тоа навистина не го импресионираше претседателот во неговиот втор мандат.
„Не можам да бидам реизбран. Не гледам на рејтингот, го правам она што и треба на земјата“, рече Макрон во интервјуто што во средата беше емитувано во живо од Елисејската палата.
Да се продолжи со зголемувањето на старосната граница за пензионирање на 64 години против волјата на мнозинството Французи?
„Тоа не беше забавно за мене, но мораше да се направи“, рече претседателот.
„Не се каам“
Контроверзната пензиска реформа, симбол на социјалната држава, беше протуркана низ парламентот од владата на Макрон без формално гласање.
Владата тогаш едвај преживеа две гласања за недоверба со тесно мнозинство.
Во многу француски градови сè уште траат насилните протести и штрајкови против реформите и претседателот.
„Мислам дека е штета што не успеавме да ги убедиме сите. Не сум среќен поради тоа, но не се каам“, рече Макрон одговарајќи на новинарски прашања.
„Останам на нашиот пристап. Го правам она што треба да се направи“, рече тој.
А можеше, вели, да се однесува како неговите претходници, да ги одложи реформите и едноставно да ги турка проблемите под тепих.
Макрон го критикува насилството на демонстрациите
Синдикалците за овој четврток на 23 март повикаа на штрајк и протести низ државата бидејќи сметаат дека „социјалдемократијата“ е во опасност.
Претседателот го изрази своето разбирање за протестите и гневот на многу луѓе. Тој смета дека користењето на правото на демонстрација е сосема легитимно.
„Ќе слушаме и ќе продолжиме да одиме напред, но никогаш нема да се поклониме пред насилството“, рече Макрон, мислејќи на насилните, ноќни немири и палењето на контејнерите и камионите за ѓубре што се случија во последните денови и недели.
„Екстремното насилство не е дел од оваа република“
Од понеделникот поради нередите се приведени неколку стотици луѓе.
Шефот на Француската лига за човекови права, Патрик Бодуен, ја критикуваше „загрижувачката ситуација на демократијата“ и зголеменото полициско насилство на „ТВ Франс инфо“.
Портпаролот на париската полиција ги отфрли обвинувањата дека имало случајни апсења.
За четврток е планирано распоредување на 5.000 полицајци за следење на синдикалните протести. Низ државата ќе ги има 12.000.
Што е следно?
Емануел Макрон ги покани социјалните партнери, синдикатите и деловните здруженија од Елисејската палата да разговараат за понатамошни реформи, повисоки минимални плати, намалување на невработеноста, повеќе работни места во индустријата и социјални проблеми.
Претседателот најави и нов данок на дополнителната добивка во индустријата.
Тој вети дека ќе обезбеди поголема правда на пазарот на трудот и здравствено безбедни работни услови за постарите работници.
Дијалогот со синдикатите треба, вели тој, да започне „во следните неколку недели“.
Истовремено, како што нагласува, не се планира укинување на пензиската реформа, реконструкција на владата, распуштање на Народното собрание, одржување нови избори или референдум.
Претседателот рече дека ќе продолжи како и досега, бидејќи „треба да се препознае реалноста“.
Франција веќе не може да си го дозволи постоечкиот пензиски систем.
Алтернативи за зголемување на старосната граница за пензионирање би биле повисоки пензиски придонеси, пониски пензии или дури и повисоки даноци.
„Дали го сакате тоа“, реторички праша Макрон. „Луѓето не сакаат да ја слушнат вистината“.
Левичарската опозиција предложи преземање поголем национален долг. Емануел Макрон решително го одби и тоа – пензија на кредит.
Критики по интервјуто
Во овој момент, многу е сомнително дали синдикатите ќе ја прифатат понудата на Макрон за дијалог.
Во првата реакција, шефот на синдикатот CGT, Филип Мартинез, рече дека претседателот „ги презира илјадниците луѓе кои досега протестираа“.
Пратеничката на Зелените Сандрин Русо го критикуваше „империјалното и арогантно“ однесување кое често му се припишува на претседателот.
Неверојатно е дека Макрон има намера да вечера со британскиот крал Чарлс III во недела во палатата во Версај, додека луѓето демонстрираат на улиците на Париз.
Емануел Макрон беше избран во Елисејската палата во 2017 година како реформатор и европски иноватор.
Многу луѓе во Франција сега се разочарани од неговата политика.
Сепак, тој беше реизбран минатата година.
Ова ја спречи десничарската популистичка опозициска политичарка Марин Ле Пен да дојде на власт.