Специјалните служби изведоа специјална операција во Гродно, Белорусија и запленија оружје и експлозиви кои требале да се употребат за терористички напади врз службеници и други лица, изјави белорускиот претседател Александар Лукашенко.
– Специјалните служби завршија одлична работа. Запленет е целиот арсенал оружје и експлозиви кои беа наменети за терористички напади од висок профил врз граѓани и функционери на владини агенции – изјави Лукашенко на средбата со највисоките претставници на безбедносните сили на земјата.
Тој посочи дека безбедносните служби добро ја завршиле работата во ваква тешка ситуација, кога терористите употребиле гранати и оружје, а ниту еден оперативец на групата „Алфа“ не е убиен, пренесе државната новинска агенција Белта.
Лукашенко истакна дека ова е „уште една порака“ и дека треба да се биде подготвен за каков било развој на ситуацијата.
Претходно беше објавено дека агенти на белорускиот комитет за државна безбедност во Гродно убија вооружен странец кој се инфилтрирал во земјата и планирал да изврши терористички напад.
Странскиот државјанин им се спротивставил на агентите отворајќи оган од автоматско оружје и активирајќи граната.
Истрагата е во тек.