Советот за безбедност на Обединетите нации денеска ќе гласа за руско-кинеската нацрт-резолуција за истрагата за саботажата на гасоводите Северен тек 1 и 2.
Во нацрт-резолуцијата, се испраќа предлог до генералниот секретар на ОН, Антонио Гутереш за формирање независна меѓународна комисија за спроведување на темелна, транспарентна и независна истрага за сите аспекти на саботажата на Северен тек 1 и 2, вклучително и идентификување на сторителите на саботажа, финансиери, организатори и нивни соработници.
Се очекува Гутереш за овие цели да назначи тим од експерти, односно комисија. Ако резолуцијата помине, Гутереш мора да ја спроведе во следните 30 дена.
Документот, исто така, ги охрабрува државите да спроведат сопствени истраги и целосно да соработуваат со комисијата и да споделуваат информации.
Русија кон крајот на февруари ја подготви првата верзија на резолуцијата за Северен тек, но не ја стави веднаш на гласање, туку ги покани членовите на Советот за безбедност да разговараат за документот, што и беше направено.
За да биде усвоена, резолуцијата мора да биде поддржана од најмалку девет од 15-те членки на Советот за безбедност.
Еден постојан член може да стави вето, но само ако се одобрат девет гласа за усвојување на резолуцијата.
Доколку резолуцијата биде поддржана од осум членки, а САД гласаат против, тоа би значело дека Америка не го искористила правото на вето, но доколку резолуцијата добие девет или повеќе гласови, спречувањето на усвојување може да се постигне само со вето.
„Не се работи за бројот на гласови, туку за начинот на кој тие гласаат“, изјави постојаниот претставник на Русија во ОН Василиј Небензја.