Кина привремено ќе воведе безвизен режим за граѓаните на Франција, Германија, Италија, Холандија, Шпанија и Малезија да ја посетат втората по големина економија во светот во обид да го поттикне туризмот по пандемијата.
Од 1 декември до 30 ноември следната година, граѓаните на оние земји кои влегуваат во Кина заради работа, туризам, посета на роднини и пријатели или во транзит не подолг од 15 дена, нема да имаат потреба од виза, објави портпаролот на МНР.
Владата, исто така, се обидува повторно да го воспостави својот имиџ низ светот по судирите со голем број западни земји за различни прашања, вклучувајќи КОВИД, човекови права, Тајван и трговија.
Неодамнешното истражување на Истражувачкиот центар Пју во 24 земји покажа дека ставовите кон Кина се главно негативни, при што 67 отсто од возрасните изразуваат неповолни ставови за земјата.
Повеќе од половина од испитаниците изјавиле дека Кина се меша во работите на други земји и не ги зема предвид интересите на другите.
– Оваа одлука ќе го олесни патувањето во Кина за бројни германски граѓани во невиден обем – објави амбасадорката на Германија во Кина Патриша Флор на социјалната медиумска платформа Х, порано позната како Твитер.
– Се надеваме дека кинеската влада ќе ги спроведе мерките објавени денеска за сите земји-членки на ЕУ – рече таа.
Патувањето без визи во Германија за кинеските граѓани ќе биде можно само ако сите членки на Европскиот Шенген договор го одобрат тоа, вели таа.
Овој месец, Кина ја прошири својата политика за безвизен транзит во 54 земји за да ги вклучи граѓаните на Норвешка.
Во август, Кина ги укина сите барања за ковид тестирање за дојдовните патници.
Во јули продолжи 15-дневниот безвизен влез за граѓаните на Сингапур и Брунеи.
Меѓународните летови во и надвор од земјата, иако закрепнуваат побавно од услугите на домашната мрежа, се во пораст.
Кинеските воздухопловни власти во октомври соопштија дека се очекуваат 16.680 неделни летови во следните пет месеци, а патничките летови ќе достигнат 71 отсто од вкупниот број летови пред четири години, пренесува Ројтерс.