Контраофанзивата на Украина против руските сили продолжи во југоисточниот дел на земјата, соопшти Киев на 8 август, додека официјалниот биланс на загинати од руски ракетен напад во источниот град Покровск претходниот ден се искачи на најмалку седум мртви и речиси 70 ранети.
Украинските трупи продолжуваат со нападите против инвазивната руска армија во правец на Бердјанск и Мелитопол во провинцијата Запорожје, објави Генералштабот на вооружените сили на Украина во своето секојдневно ажурирање.
Се наведува дека украинските сили извеле девет напади во текот на изминатиот ден насочени кон области каде што е „концентриран персонал, оружје и воена опрема на руската армија“.
Украинските војници, кои главно беа во дефанзива кога започна руската инвазија во февруари 2022 година, почнаа со контранапади ова лето.
Руските сили извршија седум ракетни напади и 42 воздушни напади во последните 24 часа, се наведува во билтенот.
Министерството за внатрешни работи на Украина ги ажурираше првичните податоци за жртвите од рускиот ракетен напад на 7 август врз градот Покровск во Доњецката област на најмалку седум мртви и 67 ранети додека спасувачките напори продолжија утрото.
Меѓу ранетите има 29 полицајци, двајца спасувачи и две деца, соопшти Министерството.
На фотографијата објавена од министерството на социјалните мрежи се гледа тешко оштетен станбен блок со целосно урнат горниот кат, додека на земјата се гледаат купишта бетон и урнатини.
Регионалните власти соопштија дека два ракетни напади го погодиле Покровск на 7 август, при што биле оштетени станбени и административни згради, хотел, ресторани и продавници, пренесува РСЕ.
Сите информации поврзани со најновите случувања со војната во Украина можете да ги прочитате ТУКА.