Твитер мора да ги зајакне своите ресурси до 25 август за да се усогласи со амбициозното ново европско законодавство за онлајн содржини, предупреди европскиот комесар Тиери Бретон по средбата со Илон Маск.
„Ако технологијата не е подготвена, Твитер мора да има доволно ресурси за да ја пополни празнината. Разговарав за таа конкретна тема со Маск“, им рекол Бретон на новинарите по средбата во седиштето на Твитер во Сан Франциско, пренесува Бета.
Комесарот на Европската комисија моментално е во Калифорнија за да се осигура дека интернет гигантите како Фејсбук, Инстаграм и Твитер се подготвени за законот за дигитални услуги, кој ќе стапи на сила на крајот на август.
Критични области
Законот е една од најамбициозните регулативи во однос на контролата на онлајн содржините од појавата на социјалните мрежи.
Наметнува долга листа на правила на платформи, пазари и пребарувачи, како што е обврската да се одговори „навремено“ на отстранување на која било нелегална или штетна содржина штом платформата ќе стане свесна за тоа.
Бретон рече дека споменал неколку критични области на состанокот, како што се злоупотреба на деца и дезинформации за изборите, за да ги направи регулативите веднаш применливи.
Предвидено е еврокомесарот да се сретне и со Марк Цукерберг, шефот на Мета, за да обезбеди усогласеност меѓу Фејсбук и Инстаграм.
Сепак, разговорот на Бретон со Маск привлекува поголемо внимание бидејќи новиот сопственик на Твитер брани речиси неограничена слобода на изразување, вклучително и кога содржината е навредлива или промовира дезинформации, спротивно на европските правила.