Турција најостро го осудува терористичкиот напад врз концертната сала во Москва, во кој загинаа најмалку 115 лица, изјави во саботата турскиот претседател Реџеп Таип Ердоган.
„Изразуваме сочувство до руската влада за терористичкиот напад на концертната сала во Москва и остро го осудуваме нападот“, рече Ердоган на состанокот во главниот град Анкара.
Тероризмот е „неприфатлив“ без разлика од каде доаѓа или кој е сторителот, додаде тој.
„Како земја која многу добро го познава крвавото и предавничко лице на тероризмот, Турција ја споделува болката на рускиот народ“, рече Ердоган.
Терористичкиот напад го извршија вооружени напаѓачи вечерта на 22 март во концертната сала Крокус Сити Хол во Москва, главниот град на Русија.
Снимката споделена на социјалните мрежи покажува како напаѓачите пукаат по случаен избор во салата од автоматско оружје.
Подоцна на лице место е снимена експлозија која предизвикала голем пожар, поради што се урнал покривот.
За време на викендот во Москва беа откажани сите јавни настани, а беше објавено дека е формирана работна група во случај на терористички напад.
Кремљ објави дека директорот на руската Федерална служба за безбедност (ФСБ), Александар Бортников, го информирал рускиот претседател Владимир Путин дека се уапсени 11 лица, меѓу кои и четворица терористи кои директно учествувале во терористичкиот напад во Москва.