Иран погуби уште едно лице уапсено за време на масовните протести што ја потресоа земјата на почетокот на годината, објави судската новинска агенција Мизан.
Смртната казна на Мохамад Абаси беше извршена откако Врховниот суд на Иран ја потврди пресудата.
Абаси беше обвинет за избодување на полицаец до смрт за време на немирите во предградие на Техеран во јануари.
Според Активистите за човекови права во Иран (ХРАНА) со седиште во САД, егзекуцијата се случила во зори.
ХРАНА наведува и дека ќерката на Абаси е во затворот Евин во Техеран и дека во истиот случај е потврдена нејзината затворска казна од 25 години.
Организацијата тврди дека адвокатот бил спречен да го застапува обвинетиот.
Групите за човекови права со години го критикуваат Иран поради неговата употреба на смртна казна, обвинувајќи ги властите дека користат егзекуции за да ги заплашат политичките противници.
Според податоците на Иранската организација за човекови права со седиште во Норвешка, минатата година во Иран биле егзекутирани најмалку 1.639 лица, најмногу во последните 35 години.