Француската влада соопшти дека нејзините стратешки залихи од маски би можеле да покријат најмалку „три месеци“ во случај на епидемија, додека властите се обидуваат да ја уверат јавноста во врска со загриженоста поврзана со хантавирусот, објави денес „Ле Фигаро“, а пренесува „Анадолија“.
Канцеларијата на премиерот Себастијан Лекорну објави дека стратешките залихи на државата се „доволни за да ја заштитат земјата најмалку три месеци во случај на епидемиски бран“.
Додаде дека залихите ја надминуваат целта поставена по пандемијата на ковид-19.
Според „Матињон“, канцеларијата на францускиот премиер, дополнителните приватни и јавни залихи што ги чуваат болниците, компаниите и локалните власти би можеле да го продолжат капацитетот за заштита за уште неколку недели.
Француските власти, исто така, изјавија дека домашниот производствен капацитет на земјата е помеѓу 2,6 и 3,5 милијарди маски годишно, што го сметаат за доволно за да се одговори на пандемија слична на ковид-19.
„Тој капацитет може дополнително да се зголеми доколку е потребно“, рекоа од „Матињон“.
Француските власти се обидуваат да ја смират јавноста по загриженоста предизвикана од пријавените случаи на хантавирус, нагласувајќи истовремено дека ширењето на инфекцијата не е регистрирано во земјата.
Матњон, исто така, нагласи дека вирусот е значително помалку заразен од ковид-19 и дека досега е потврден само еден случај во Франција.
Хантавирусот е ретка болест која најчесто се пренесува преку заразени глодари или нивниот измет, иако некои соеви можат да се пренесат и меѓу луѓето.
Според Светската здравствена организација, стапката на смртност може да достигне помеѓу 40 и 50 проценти, особено кај постарите лица и лицата со постоечки здравствени проблеми.