Бил Гејтс го откажа говорот на Самитот за влијанието на вештачката интелигенција во Индија поради прашања за неговата врска со осудениот сексуален престапник Џефри Епстин, објави Гардијан.
Основачот на Мајкрософт отпатува во Индија претходно оваа недела, каде што неговата фондација работи со владата на проекти за примена на вештачката интелигенција за општествено добро, и беше најавено дека ќе зборува по индискиот премиер Нарендра Моди.
Сепак, неколку часа пред да им се обрати на делегатите, Гејтс го откажа своето учество.
Фондацијата Гејтс соопшти дека одлуката е донесена за да се задржи фокусот на приоритетите на самитот, иако беше потврдено дека ќе одржи говор помалку од 48 часа претходно.
Повлекувањето следи по новото објавување документи поврзани со Епстин, што повторно разгоре контроверзии околу нивните контакти кон крајот на јануари.
Гејтс претходно рече дека „жали за секоја минута“ што ја поминал со Епстин и ги отфрли како лажни обвинувањата од нацрт-е-пораките што се појавија во објавените документи.
Фондацијата соопшти дека останува посветена на својата работа во Индија и дека на самитот ќе биде претставена од претседателот на канцеларијата за Африка и Индија, Анкур Вора.
На состанокот во Њу Делхи се очекува да зборуваат и извршниот директор на OpenAI, Сем Алтман, како и генералниот секретар на ОН, Антонио Гутереш, кој повика развојот на вештачката интелигенција да не се остава на „каприците на неколку милијардери“ и да се поддржи глобален фонд за отворен пристап до технологија.