Украина се согласи со своите западни партнери дека секое руско кршење на идниот договор за прекин на огнот ќе предизвика координиран воен одговор од Европа и САД, објави денес „Фајненшл тајмс“, повикувајќи се на информирани извори.
Како што објавува „Ројтерс“, украинските, европските и американските претставници го дискутираа планот неколку пати во декември и јануари.
Планот би вклучувал повеќефазен одговор на секое руско кршење на договореното примирје, се вели во извештајот.
Емисарите од Киев, Москва и Вашингтон ќе се состанат во Абу Даби во среда и четврток на разговори за прекин на војната.
Според предлогот, секое руско кршење на прекинот на огнот би предизвикало одговор во рок од 24 часа, почнувајќи со дипломатско предупредување и, доколку е потребно, акција од страна на украинската војска за запирање на кршењето.
Доколку непријателствата продолжат по тоа, предлогот би преминал на втора фаза на интервенција со користење на силите на таканаречената Коалиција на волјата, која вклучува многу членки на ЕУ и Обединетото Кралство, Норвешка, Исланд и Турција, се вели во извештајот.
Во извештајот се додава дека во случај на проширен напад, координиран одговор од страна на силите поддржани од Западот, вклучувајќи ја и американската војска, ќе биде започнат 72 часа по првичното кршење на безбедноста.