Украинскиот претседател Володимир Зеленски денеска негативно го оцени извештајот на Амнести интернешнал, во кој се тврди дека силите на земјата повремено користеле тактики што ги загрозуваат цивилите додека ѝ се спротивставувале на руската армија.
Зеленски тврди дека извештајот на Амнести се обидува да ја „префрли одговорноста“ за убиството на цивили од Русија во Украина, пренесува Си-Ен-Ен.
– Денеска видовме сосема поинаков извештај на Амнести интернешнал, кој, за жал, се обидува да ја амнестира терористичката држава и да ја префрли одговорноста од агресорот на жртвата – рече Зеленски, пренесе Си-Ен-Ен.
Тој посочи дека нема и не може да има, дури и хипотетички, услови под кои секој руски напад врз Украина станува оправдан и додаде дека Русија уништила стотици верски објекти, речиси 900 медицински установи и илјадници училишта.
– Ова е таква неморална селективност. Секој што ја амнестира Русија и кој вештачки создава таков информативен контекст во кој некои напади од терористи се наводно оправдани или наводно разбирливи, мора да биде свесен дека тоа им помага на терористите – оцени Зеленски, пренесува Си-Ен-Ен.
Амнести интернешенел вчера објави извештај во кој се вели дека украинските сили ги изложиле цивилите на ризик со воспоставување бази и поставување оперативни системи за оружје во населени станбени области, вклучувајќи училишта и болници.
Сите информации поврзани со најновите случувања во Тајван можете да ги прочитате ТУКА.