Плановите на Северноатлантската алијанса за одржување голема воена вежба во близина на руските граници се провокативни, го зголемуваат ризикот од воени инциденти и може да доведат до трагични последици за Европа, изјави портпаролката на руското Министерство за надворешни работи, Марија Захарова.
„Тие вежби се отворено провокативни. Неколку месеци група од 90.000 војници од 31 членка на НАТО и Шведска активно ќе дејствува во близина на руските граници. Тој чекор е насочен кон ескалација на ситуацијата, го зголемува ризикот од воени инциденти и на крајот може да доведе до трагични последици за Европа“, рече Захарова, пренесува Тас.
Според неа, НАТО не крие дека за време на најголемите маневри по Студената војна ќе се вежбаат „задачи за одбивање на руската закана“.
„Претседателот на Воениот комитет на НАТО, адмиралот Роб Бауер, рече дека алијансата се подготвува за конфликт со Русија, а слични коментари неколкупати се слушнаа од раководството на членките на НАТО“, рече Захарова.
Таа посочи дека на овој начин НАТО се обидува да го оправда своето постоење во очите на милиони Европејци и Американци и да го оправда големото зголемување на воените трошоци под изговор дека мора да ја задржи Русија.