Украина во моментов се соочува со сериозен недостиг на работна сила и намалување на стапката на наталитет, додека привлекувањето мигранти од посиромашните земји нема да биде доволно за да се решат сите проблеми, пишува Украинска правда.
Поради целосната војна, голем број граѓани ја напуштија земјата и добија статус на бегалци, додека стапката на наталитет падна на критично ниско ниво.
Во октомври минатата година, Обединетите нации проценија дека повеќе од 5,8 милиони Украинци се во странство, од кои 5,2 милиони се во Европа како бегалци, што дополнително ги продлабочува проблемите на пазарот на трудот во земјата која веќе се соочува со значителен недостиг на работна сила.
Раководителот на Канцеларијата за миграциска политика, Васил Воскобојник, изјави дека, според проценките, Украина може да привлече до 300.000 мигранти годишно.
„Пред војната, во нашата земја секоја година се раѓаа помеѓу 200.000 и 250.000 луѓе, додека околу половина милион умираа. Ова значи дека населението се намалувало за 250.000 на 300.000 секоја година. За да ја одржиме големината на населението, ќе мора да привлечеме ист број мигранти од странство“, рече тој.
Според него, во периодот пред почетокот на војната, во 2020 и 2021 година, Државниот центар за вработување издал и одобрил околу 20.000 до 22.000 работни дозволи годишно, додека во 2025 година, тој број бил малку повеќе од 9.500.
„Експертските проценки покажуваат дека во следните пет до десет години е реално да се очекува доаѓање на десетици илјади странски работници, но во моментов нема основа за очекувања од стотици илјади“, рече Воскобојник.
Тој додаде дека е малку веројатно Украина да стане нова Мека за голем број мигранти и дека се сомнева во тезата дека голем бран странци кои бараат подобра финансиска судбина ќе се преселат во Украина.
„Дури и ако земјата се обиде да привлече стотици илјади луѓе, тие ќе имаат избор и ќе се одлучат за побогати земји, како што се Полска или Германија, каде што платите се повисоки“, рече тој.
Директорката на Институтот за демографија и социјални истражувања „М.В. Птух“, Ела Либанова, истакнува дека Украина нема да може без работни мигранти, но и дека по завршувањето на војната се очекува реконструкција според моделот на американскиот „Маршалов план“.
„Светската банка работи на тоа, а планот е веќе подготвен. Учествував во неговиот развој и можам да потврдам дека предвидува значително зголемување на потребата од работна сила“, рече Либанова, нагласувајќи дека најголема побарувачка ќе има за градежни работници.
Институтот за демографија на Националната академија на науките на Украина проценува дека населението ќе продолжи да се намалува и би можело да достигне 25 милиони до 2051 година.
Во исто време, очекуваниот животен век се намалил, од 65,2 на 57,3 години за мажите и од 74,4 на 70,9 години за жените.
Според прогнозите на Обединетите нации, Украина би можела да има еден од најмалите удели на млади луѓе во светот, со само 6,6 проценти од населението на возраст од 15 до 24 години.
Владините претставници планираат низа мерки за поттикнување на демографското закрепнување, вклучувајќи развој на системи за социјални услуги, изградба на достапни и безбедни градинки, воведување флексибилни услови за работа за родителите, како и програми за поволни кредити за решавање на станбеното прашање.
За враќање на граѓаните од странство, планирано е реновирање на станбени згради и инфраструктура, доделување грантови за започнување сопствен бизнис, како и изградба на нови засолништа, пренесува Танјуг.