Десетдневното примирје, кое го објави американскиот претседател Доналд Трамп, а за кое се согласија Либан и Израел, стапи во сила денес.
Либанските медиуми објавија дека израелското гранатирање на селата Кијам и Дибин продолжило половина час по прекинот на огнот што започна на полноќ по локално време.
Израелската војска утрово соопшти дека истражува извештаи за гранатирање и артилериски оган во јужен Либан.
Според договорот за прекин на огнот, на Израел му е забрането да спроведува офанзивни воени дејствија во Либан, но како што објавува АП, „самоодбрана од планирани, непосредни или тековни напади“ не е исклучена.
Генералниот секретар на Обединетите нации, Антонио Гутереш, изрази надеж дека примирјето ќе го отвори патот за преговори за долгорочно решение на конфликтот меѓу Израел и Хезболах, изјави портпаролот на ОН, Стефан Дужарик.
Гутереш ја пофали улогата на Соединетите Американски Држави во постигнувањето примирје меѓу Израел и Либан.
Израел и Либан во вторник во Вашингтон ги одржаа првите директни дипломатски разговори по децении, по повеќе од еден месец војна меѓу Израел и екстремистичката проиранска група Хезболах со седиште во Либан.