Претседателот на Чешката Република Петр Павел изјави дека за доброто на безбедноста разузнавачките служби треба да ги следат Русите во западните земји, бидејќи тие се државјани на земја која е во војна со Украина.
Новиот чешки претседател, поранешен генерал на НАТО, ја спореди ситуацијата со жителите со јапонско потекло кои живееле во САД за време на Втората светска војна.
„Сите Руси кои живеат во западните земји треба да бидат надгледувани многу повеќе отколку порано, бидејќи тие се граѓани на нација која води агресивна војна“, изјави Павел за Радио Слободна Европа (РСЕ), пренесува АФП.
„Можам да жалам за тие луѓе, но во исто време, кога ќе погледнеме наназад, на почетокот на Втората светска војна, целото јапонско население во САД исто така беше под строг режим на надзор. Тоа е едноставно цената на војната“, рече чешкиот претседател, кој дојде на власт во март.
Новинарите го прашаа што мисли под „надзор“, а Павел рече дека зборува за „безбедносни служби“.
Буш ѝ се извини на Јапонија
Околу 120.000 жители со јапонско потекло за време на Втората светска војна биле сместени во кампови за да бидат под надзор на американските власти.
Американскиот претседател Џорџ Х.В. Буш ѝ се извини на Јапонија за ова во 1991 година.
Павел ја посети Украина во април, а во четвртокот рече дека очекува јасна поддршка за членството на таа земја од состанокот на НАТО во јули во Вилнус.
„Цврсто сум убеден дека сите лидери ќе разберат дека присуството на Украина во НАТО и Европската унија е веројатно единствената гаранција за обезбедување стабилност во овој регион, за зајакнување и на НАТО и на ЕУ и за одвраќање на агресивната политика на Русија“, рече тој.
„Гледам дека многу земји се согласуваат за долгорочен план за поддршка на Украина, кој нема да се заснова на еднократни придонеси, туку на внимателно планирана долгорочна процедура“, додаде тој.
Чешката Република, членка на НАТО со околу 10,8 милиони жители, значително му помага на Киев на хуманитарниот и воениот фронт; прими речиси половина милион бегалци од Украина.
Сите информации поврзани со најновите случувања со војната во Украина можете да ги прочитате ТУКА.