Две лица во кумановското село Табановце утринава се пронајдени починати со повреди на нивните тела.
Засега останува непознато дали станува збор за убиство и самоубиство како што утринава кружеа шпекулациите низ Куманово, а од кумановската полиција само кратко информираа дека се пранјдени тела на две лица на 43. и 36-годишна возраст.
Според засега непотрврцени информации, лицата биле брачен пар, а телата утринава ги пронашол нивниот син.
– На 17.08.2021 година во 08.20 часот во СВР Куманово било пријавено дека во семејната куќа во с.Табановце, кумановско, биле пронајдени починати и со повреди Б.С.(43) и неговата сопруга Б.С.(36). По преземани мерки било констатирано дека Б.С. починала од здобиени повреди од остар предмет, додека нејзиниот сопруг имал прострелна рана од огнено оружје, велат од кумановската полиција.
И од Основното јавно обвинителство Куманово не дадоа конкретни детали, оттаму само додаваат дека телата се предадени на обдукција.
– Со цел утврдување на причините за смртта на двајцата сопружници јавниот обвинител издаде наредба за обдукција на телата на починатите, како и наредба за вештачење на пронајдените траги и материјални докази на лице место, информираат од ОЈО Куманово.
Нема очевидци на настанот, а според информации од мештаните телата ги пронашол нивниот син, по што ја повикал својата баба која не живеела со нив, а откако дошла останала шокирана од глетката што ја затекнала.
Како што велат мештаните на селото Табановце, сега веќе починатиот маж, пред две недели излегол од затвор, а бил познат на полицијата од претходно по разни инциденти и насилно однесување.
Никола Ивановски