Граѓаните да останат дома за велигденските празници, порача денеска од Куманово премиерот Оливер Спасовски во пресрет на најдолгиот полициски час во историјата на земјата кој започнува во петок и ќе трае до вторник, денови кога православните верници го слават Велигден.
Спасовски апелираше да нема групирања и да се одржува социјалната дистанца за претстојните празници.
– Упатив порака пред неколку дена во која реков дека сега е моментот велигденските празници сите заедно да ги прославиме дома во кругот на нашите семејства и во духот на нашата традиција. Немаме одлука за затворање на верските објекти и непрактикување на верата, затоа што тоа не може да се донесе, дури во било каква состојба да се наоѓа државата тоа е право кое што е неприкосновено, но знаете дека имаме ставови и одлуки и на Македонската православна црква, односно на Светиот синод и на Исламскста верска заедница, што се однесува на почитување на мерките на владата што се однесува до социјалната дистанца, изјави Спасовски.
Тој ги повика граѓаните да останат со своите семејства и така да допринесат за спречување на ширењето на вирусот.
Никола Ивановски