Бројот на граѓани во Германија кои поради причини поврзани со совеста одбиваат воена служба продолжува да расте, бидејќи Берлин повторно воведува систематски воени досиеја и дебати за зајакнување на Бундесверот.
Како што објави весникот „Ноје ознабрикер цајтунг“, повикувајќи се на податоците на Сојузната служба за семејни прашања и граѓанско општество, во првиот квартал од 2026 година биле поднесени 2.656 барања за признавање на правото на приговор на совеста на воена служба.
Тој број, веќе по три месеци, е блиску до вкупниот број на пријавени во текот на целата претходна година, јави ДПА.
Според достапните податоци, бројот на барања рапидно расте во последниве години: 1.609 биле поднесени во 2023 година, 2.998 во 2024 година и 3.867 во 2025 година. суспендиран.
Зголемувањето на бројот на барања е поврзано со променетата безбедносна ситуација во Европа, војната во Украина и се погласните дискусии во Германија за можното враќање на воениот рок.
Од 1 јануари 2026 година, во сила е нов модел на служење воен рок, кој формално останува доброволно, но повторно воведува регистрација на млади мажи и обврска за пополнување прашалник за здравје, физичка подготвеност и однос кон воениот рок. За жените учеството во тој процес е доброволно.
Германските власти нагласуваат дека целта на новиот систем не е итно враќање на задолжителната воена служба, туку пополнување на кадровските потреби на Бундесверот и создавање база на податоци што би овозможила побрза мобилизација во случај на влошување на безбедносната состојба.
Берлин планира значително да го зголеми бројот на активни членови на вооружените сили и резервисти до средината на 1930-тите.
Вниманието на јавноста го привлече и одредбата според која младите мажи на возраст од 17 до 45 години во одредени случаи мора да го известат надлежниот центар на Бундесверот доколку планираат да останат во странство подолго од три месеци.
Министерството за одбрана по критиките изјави дека во услови на доброволно служење воен рок нема да се оневозможува патување и дека се работи за формалност.
Задолжителниот воен рок во Германија беше суспендиран во јули 2011 година, по преминот во професионална војска.
Новото зголемување на бројот на барања за приговор на совеста, сепак, покажува дека враќањето на воената тема во центарот на германската политика веќе се рефлектира во ставовите на граѓаните кон можноста за служење во вооружените сили.