Голем број демонстранти во пристанишниот град Ротердам запалија автомобили и фрлаа камења кон полицијата, која одговори со истрели и водени топови, откако протестите против построгите мерки за Ковид-19 станаа насилни во петокот вечерта, а седум лица беа повредени.
„Пукавме предупредувачки истрели, а имаше и директни, бидејќи ситуацијата беше опасна по живот“, изјави за Ројтерс портпаролката на полицијата Патриша Веселс.
„Знаеме дека најмалку две лица се повредени, веројатно како резултат на предупредувачки истрели, но треба дополнително да ја истражиме точната причина“, рече таа.
Подоцна беше пријавено дека се повредени полицајци.
NOW – Violent protests against Covid-restrictions in #Rotterdam, Netherlands.pic.twitter.com/xCTyqiy609
— Disclose.tv (@disclosetv) November 19, 2021
Агенцијата dpa јави дека најмалку седум лица се повредени, а десетици се уапсени.
Некои луѓе на социјалните мрежи споделија слики од човекот за кој рекоа дека бил застрелан од полицијата, но полицијата вели дека иако ги видела фотографиите, сè уште не знае како лицето е повредено.
Неколку стотици луѓе се собраа да изразат противење на плановите на владата да го ограничи пристапот до затворени објекти за луѓе кои немаат сертификат за КОВИД – доказ дека се вакцинирани или закрепнале од инфекција со коронавирус.
Полицијата издаде итна наредба во Ротердам и го прекина јавниот превоз и им нареди на луѓето да останат дома.
Беа употребени водени топови, а полицијата на коњи ја растера толпата.
Властите, исто така, ги повикаа минувачите и луѓето кои ги снимиле немирите да ја испратат снимката во полиција за понатамошна истрага.
Холандија повторно воведе некои мерки за затворање минатиот викенд за три недели, во обид да го забави повторното ширење на коронавирусот, но дневните инфекции останаа на највисоките нивоа од почетокот на пандемијата.
На видеото објавено на социјалните мрежи се гледаат запалени полициски автомобили и демонстранти како фрлаат пиротехнички средства и камења кон полицијата.