Австралиските научници утврдиле дека женките змии имаат клиторис, јавува Би-Би-Си, во истражувањето кое ги дало првите точни анатомски описи на гениталиите на женските змии.
Пенисите на змиите се проучувани со децении, но женскиот генитален орган е занемарен.
Меган Фолвел, докторант и главен истражувач, рече дека клиторисот се наоѓа во опашката.
Змиите имаат два поединечни клиториси, разделени со ткиво и скриени на долната страна на опашката.
Органот со двојни ѕидови се состои од нерви и црвени крвни зрнца, а ткивото е слично на еректилно ткиво.
Фолвел рече дека го започнала истражувањето бидејќи претходното истражување немало смисла за неа.
„Знам дека [клиторисот] постои кај многу животни и нема смисла да не постои кај сите животни“, рече таа.
Проучени се 9 видови
Нејзиниот тим потоа го тестирал ова на различни змии, сецирајќи вкупно девет видови.
„Досега, научниците веруваа дека сексот кај змиите главно се однесува на принуда и дека мажјакот ја принудува змијата да се парат“, вели Фолвел.
„Но, сега со откривањето на клиторисот, можеме да почнеме да гледаме повеќе кон заведување и стимулација при парењето на змиите“, се вели во извештајот.
Таа забележала дека кај некои видови змии клиторисот е кревок и особено мал – помалку од милиметар.
Исто така, преовладувало верувањето дека женките змии имаат помала верзија на машките гениталии, како што е случајот со гуштери.
Така, во некои претходни студии за интерсексуални змии, научниците погрешно го означиле пенисот како клиторис.