По веста за пресушување на европските водни патишта, реките По и Рајна, лоши вести за снабдувањето со вода за пиење и земјоделството доаѓаат од Стариот континент, пренесува Јутарњи.
Бидејќи високите температури и долгите периоди без дожд сериозно го загрозија земјоделството, Европската комисија одговори со апел до земјите-членки да користат прочистена отпадна вода за наводнување на земјоделските култури.
– Залихите на вода за пиење се мали и под зголемен притисок. Додека траат топлотните бранови, треба да престанеме да трошиме вода и да го користиме овој вреден ресурс поефикасно. Неопходно е да се прилагодиме на климатските промени и да се обезбеди безбедност и одржливост на земјоделството – се вели во соопштението на европскиот комесар за животна средина Вирџинијус Синкевичиус.
Во јули, експертите и Комисијата предупредија дека 46 отсто од Европа е во опасност од суша.
Франција и Обединетото Кралство минатиот месец потврдија дека забележале најсушен јули досега, со негативно влијание врз земјоделското производство и недостигот на урбана вода.
Но, британските водоводни претпријатија, приватни од доцните 1980-ти, досега се спротивставија на владините повици да воведат ограничувања.
Како што коментира „Гардијан“, тие компании решиле да почекаат до последен момент за да воведат привремени забрани за прекумерно користење на водата бидејќи не сакаат да ги налутат потрошувачите.
„И покрај загриженоста дека реките би можеле да пресушат, компаниите засега не гледаат ризик за залихите од елементарно значење“, изјави владин претставник за Гардијан.
Од другата страна на Каналот, ситуацијата не е ништо подобра.
Метео Франс објави дека земјата забележала само 9,7 милиметри дожд во јули, што е само 12 отсто од потребната количина на врнежи, според министерот за животна средина Кристоф Бечу.
Речиси сите француски региони воведоа ограничувања за вода, а земјоделците се борат да ги наводнуваат културите како што е сончогледот.
Огромните полиња со лаванда пресушуваат поради недостаток на вода.
Во Шпанија, сушата ги принуди земјоделците да ги намалат насадите со авокадо и производството на маслинки.
Поради сушата се очекува да се намали количината на маслиново масло на пазарот, а во неволја е и уште еден голем производител – Италија.
Бидејќи нема доволно вода за сончоглед, се очекува дополнителен скок на цените на маслото за јадење.
Многу шпански региони ја ограничија потрошувачката на вода. Меѓу мерките се и прекини во ноќното водоснабдување, затворање на тушеви на плажите и забрани за полнење на базени и перални за автомобили.
На крајот на јули, водните резерви во Шпанија беа на 40 отсто од капацитетот, што е најниско ниво во последните десет години.
Нискиот водостој на Рајна предизвикува проблеми во Швајцарија и Германија.
Покрај земјоделските култури, проблем се и транспортните патишта. Хрватска не е во подобра позиција од европските соседи, а поради сушата проблеми стигнаа и до Португалија и Романија.
Владата во Холандија, земјоделска централа во ЕУ, прогласи недостиг на вода во средата и најави дополнителни мерки доколку сушата продолжи.
– Ги замолувам сите двапати да размислат пред да го измијат својот автомобил или да ги наполнат детските базени до врвот – рече министерот за инфраструктура Марк Харберс.