НАТО работи со САД за да ги разјасни деталите од одлуката за планираното повлекување на американските трупи од Германија, изјави портпаролката на НАТО, Алисон Харт.
„Работиме со САД за да ги разбереме деталите од нивната одлука за распоредување на сили во Германија“, рече таа на платформата X.
Харт изјави дека ова е прилагодување на военото распоредување, што дополнително ја нагласува потребата европските земји да ги зголемат инвестициите во одбраната и да преземат поголема одговорност за заедничката безбедност.
Таа потсети дека сојузниците веќе постигнале напредок во оваа насока по договорот за зголемување на средствата за одбрана на самитот во Хаг минатата година.
„Веќе гледаме напредок откако сојузниците се согласија да инвестираат 5 проценти од БДП на самитот на НАТО во Хаг минатата година. Остануваме уверени во нашата способност да обезбедиме одвраќање и одбрана додека овој потег кон посилна Европа во посилно НАТО продолжува“, додаде портпаролката на Алијансата.