Управата на Кошаркарскиот клуб Куманово излезе со сооштение во јавноста во која јавено прашува дали во Македонија постојат само тројца судии, а сетоа тоа поради фактот што исти судии се делегираат да делат правда на сите натпревари од финалната фаза од домашниот кошаркарски шампионат.
Управата на КК Куманово 2009, како и сите поддржувачи на клубот и љубители на спортот и кошарката во Куманово се згрозени од однесувањето на Комисијата за натпреварување во делот на делегирањето на судии за натпреварите од Плеј-офот на кошаркарското првенство на Македонија. Се прашуваме дали во Македонија има само 3 судии кои можат да ги судат сите клучни натпревари на крајот на сезоната, од кои двајца се т.н. буџетари, односно директно зависат од однесувањето на централната власт во државата, а на сите ни е јасно дека политиката има силно влијание во македонската кошарка, без на ниту еден начин да го оспориме квалитетот на КК МЗТ Скопје Аеродром, нивниот состав и игра.
Сметаме дека е крајно време Комисијата за натпреварување да излезе со јасен став за ваквото свое однесување и да даде образложение за ваквите свои одлуки, а сè со единствена цел истите да не се повторуваат во интерес на унапредување на кошарката во Македонија – стои во сооштението.
Марјан Мицевски инаку е единствениот судија што ја делеше правдата на трите финални средби меѓу МЗТ Скопје и Куманово. Два пати судија во оваа финална серија беше Милојевиќ, а по еднаш правдата ја делеа Зоран и Игор Митровски, Феревски и Павлов.
Интересно е што Мицевски повторно ќе биде прв судија и на четвртиот дуел од финалната серија, а друштво ќе му прават Милојевиќ и Зоран Митровски