Германскиот програмер Штефан Томас го изгубил кодот за пристап до профилот, на која има 7.002 биткоини, вредни околу 220 милиони долари, а му преостануваат само уште два обида да го погоди, пред сметката да се заклучи засекогаш.
Зборувајќи за Њујорк Тајмс, Германецот, кој моментално живее во Калифорнија, откри дека му биле подарени биткоини кога во 2011 година направил анимиран филм за таа криптовалута.
Биткоинот минатата година забележа големо зголемување на вредноста, а пред неколку дена ја надмина вредноста од 30.000 долари.
Томас вели дека истата година ја изгубил лозинката за пристап до неговиот „железен клуч“, криптиран хард диск кој содржи клучеви од неговиот дигитален паричник.
Оттогаш, тој пробал осум различни варијации на неговите вообичаени лозинки во обид да пристапи до неговиот „железен клуч“.
За жал, никоја од нив не била точна, а „железниот клуч“ им овозможува на корисниците 10 обиди пред да биде засекогаш заклучен заедно со целата содржина, пишува Њујорк Тајмс.
Биткоинот не може да му помогне, бидејќи не чува кориснички лозинки, туку им дава на лицата кои купуваат валута личен клуч за нивниот дигитален паричник, до кој имаат пристап само тие.
„Ќе лежев во кревет и ќе размислував. Тогаш ќе одев на компјутер со нов план. Кога тој ќе пропаднеше, јас повторно очајував“, рече несреќниот програмер.
Томас сега ангажирал криптографи кои се надева дека ќе му помогнат да пристапи до неговиот дигитален паричник од 220 милиони долари.