Дигиталниот сертификат на ЕУ помогнал во координирањето на ограничувањата за патување меѓу земјите на ЕУ и беше ефикасен во олеснувањето на патувањето за време на пандемијата, но влијанието на другите инструменти на ЕУ беше скромно, се заклучува во извештајот објавен денеска од Европскиот суд на ревизори.
Ревизорите заклучија дека Европската комисија, и покрај ограничената надлежност во политиката за јавно здравје, реагираше брзо и предложи соодветни технолошки решенија.
Употребата на овие алатки во земјите на ЕУ значително се разликуваше, така што нивното влијание во смисла на олеснување на патувањето беше нерамномерно.
Ревизорите ја повикуваат ЕУ подобро да се подготви, за поуспешно да се соочи со потенцијалните идни вонредни ситуации, соопштија ревизорите на денешната прес-конференција.
Во март 2020 година, земјите на ЕУ почнаа да воведуваат гранични контроли и ограничувања за патување.
Европската комисија презеде различни иницијативи за ограничување на влијанието на овие мерки врз слободното движење.
Конкретно, ова вклучуваше алатка за следење контакти, формулари за дигитални локатори на патници и платформа за нивна размена, како и дигитален сертификат за ковид на ЕУ.
Некои од алатките станаа оперативни седум месеци по почетокот на пандемијата, додека дигиталниот сертификат на ЕУ стапи на сила пред земјите од ЕУ да ги финализираат своите планови за вакцинација.
Спротивно на тоа, формуларите за следење патници беа развиени премногу доцна, бидејќи решенијата на некои земји-членки на национално ниво беа достапни порано.
За алатките развиени од Европската комисија, ЕУ потроши 71 милион евра.
Конечно, ревизијата укажува на недостаток на конкретни процедури за долгорочно користење на овие алатки или за нивно брзо реактивирање во случај да бидат повторно потребни.