Двајца мажи се осудени во Замбија на две години затвор со тешка работа за заговор за употреба на магија за атентат врз претседателот на таа земја, Хакаине Хичилема.
Локалниот поглавар Леонард Фири и граѓанинот на Мозамбик, Џастин Мабулесе Кандунде, беа уапсени во декември откако чистач пријавил дека слушнал чудни звуци.
Локалните власти соопштија дека пронашле жив камелеон и други „разни амајлии“ во нивна сопственост, вклучувајќи црвена ткаенина, неидентификуван бел прав и животинска опашка, објавува Гардијан.
Пресудата е донесена според британскиот колонијален закон што го криминализира „вештерството“.
Обвинителството објави дека обвинетите биле ангажирани од братот на опозицискиот пратеник Емануел Џ.Џ. Банда, кој се соочува со обвиненија за грабеж, обид за убиство и бегство од затвор.
Случајот доаѓа во време кога Хичилема се соочува со зголемени критики за сузбивање на слободата на говорот и политичката опозиција.
„Јас лично не верувам во магија, никогаш не сум верувал во магија, како личност, како семеен човек, како христијанин“, рече Хичилема минатиот месец.
Обвинувањата за вештерство не се невообичаени во политиката на Замбија, но многу луѓе во Замбија сметаат дека традиционалните духовни верувања не треба да се криминализираат.