Најмалку девет лица беа убиени, а четири куќи беа уништени во утринскиот напад врз градот Астане-је Ашрафије во северната иранска покраина Гилан, потврдија локалните власти.
Во соопштението од канцеларијата на гувернерот се наведува дека уште 33 лица се повредени, а нападот е окарактеризиран како „терористички“.
Заменик-гувернерот изјави дека меѓу загинатите и повредените има 16 жени и деца.
Убиен нуклеарен научник
Иранските медиуми објавија дека нападот го извршила израелската армија, иако официјален Израел сè уште не ги коментирал тврдењата.
Некои медиуми објавија дека меѓу загинатите е и иранскиот нуклеарен научник Мухамед Реза Седики.
Израелските одбранбени сили (ИДФ) во својот извештај наведоа дека „елиминирале уште еден високо рангиран ирански нуклеарен научник преку ноќ“, но неговото име сè уште не е официјално објавено.