Британскиот премиер Риши Сунак изјави дека Велика Британија ќе воведе нови мерки насочени кон намалување на бројот на мигранти кои од Албанија пристигнуваат во Обединетото Кралство со мали чамци преку Ла Манш.
Сунак, кој се соочува со зголемен притисок да го ограничи зголемениот број мигранти кои доаѓаат преку Каналот, рече дека планира да воведе нова легислатива на почетокот на следната година за да се осигура дека луѓето кои пристигнуваат илегално не можат да останат во Британија.
Премиерот изјави дека се вработени дополнителни стотици работници за да ги обработат барањата за азил и да ги решат акумулираните барања за чекање, кои се проценуваат на повеќе од 143.000 за да бидат решени до крајот на следната година, пренесе АП.
– Илјадници Албанци ќе бидат вратени дома во следните месеци, рече Сунак во парламентот.
Тој рече дека Британија добила формални гаранции од албанската влада дека ќе ги заштити вистинските жртви и луѓето кои се изложени на ризик од повторна трговија со луѓе.
Сунак и други официјални лица инсистираа дека Албанија е фундаментално безбедна земја и дека повеќето барања за азил на нејзините граѓани се неосновани, пренесува Танјуг.
Повеќе од 10.000 Албанци пристигнале преку Ла Манш оваа година и побарале азил, што сочинува речиси четвртина од рекордните 44.000 луѓе кои стигнале во Велика Британија преку тој пат, според АП.
Само неколку десетици албански баратели на азил пристигнаа во Британија во 2020 година.
Британските власти рекоа дека големото зголемување може да се должи на зголемената активност на албанските криминалци кои дејствуваат во северна Франција, објави американската агенција.
Албанскиот премиер Еди Рама неодамна изјави дека Велика Британија треба да престане да ги дискриминира луѓето од неговата земја за да ги оправда сопствените неуспеси.
Високиот комесаријат за бегалци на ОН (УНХЦР) посочи дека плановите на Велика Британија ќе го поткопаат глобалниот бегалски систем како целина и ќе го прекршат меѓународното право за бегалци.
Ограничувањето на пристапот до азил само на оние кои доаѓаат по „безбедни, легални патишта“, кои Велика Британија има намера да ги воведе, е во спротивност со основните принципи на меѓународната солидарност на кои се заснова Конвенцијата за бегалци од 1951 година, се вели во соопштението на УНХЦР.