Куба остана без дизел и мазут, објави во средата министерот за енергетика и рударство Висенте де ла О, предупредувајќи дека електроенергетскиот систем е во „критична состојба“.
Министерот на државната телевизија изјави дека во Хавана има сè почести и подолги прекини на струја, при што некои населби остануваат без струја и до 20 часа на ден.
Кризата дополнително се продлабочува поради недостигот на храна, гориво и лекови.
Според него, националната електроенергетска мрежа во моментов работи исклучиво на домашна сурова нафта, природен гас и обновливи извори, но производството е ограничено поради недостигот на извори на енергија.
Во последните две години Куба инсталираше околу 1.300 мегавати соларна енергија, но дел од капацитетот останува неискористен поради нестабилноста на мрежата и проблемите со снабдувањето со гориво, истакна министерот.
Тој додаде дека властите продолжуваат со преговорите за увоз на гориво и покрај американските санкции и глобалното поскапување на нафтата и транспортот, што дополнително го отежнува снабдувањето.
„Куба е отворена за секој што сака да ни продава гориво“, рече Де ла О.
Министерот потсети дека по извршната наредба потпишана од американскиот претседател Доналд Трамп во јануари, со која беше објавено воведување тарифи за земјите што извезуваат гориво во Куба, прекинати се испораките од традиционални извори како Мексико и Венецуела.
Оттогаш, според достапните податоци, само еден голем танкер со руско знаме испорача сурова нафта на островот.
Обединетите нации минатата недела ги прогласија американските мерки за незаконски, предупредувајќи дека тие го загрозуваат правото на кубанските граѓани на развој и пристап до храна, здравје и основни услуги.