Иран во моментов нема планови да ги продолжи преговорите со САД, потврди во понеделникот портпаролот на Министерството за надворешни работи Есмаил Багаи.
„Додека сега разговарам со вас, немаме никаков план за следната рунда преговори“, рече Багаи на прес-конференција, пренесува Iran International.
Оваа порака доаѓа во време кога е неизвесно дали ќе има нови средби меѓу Техеран и Вашингтон.
Иранските власти, во меѓувреме, ги обвинуваат САД за несериозност во дипломатските напори, со обвинувања за постојано прекршување на примирјето.
Багаи нагласи дека дејствијата на американската страна, вклучително, како што тврди, кршењето на договорите поврзани со Либан, како и обидите за воведување поморска блокада на Иран, дополнително ја поткопуваат меѓусебната доверба.
„САД со контрадикторно однесување и континуирано кршење на примирјето покажаа дека не се сериозни во водење дипломатија“, рече тој.
Тој, исто така, посочи дека одредени потези на Вашингтон, како што е наводниот напад на ирански трговски брод, според неговите зборови, се јасен акт на агресија што е во спротивност со резолуциите на Обединетите нации.
„Јасната контрадикторност меѓу зборовите и делата дополнително ја зголемува недовербата на иранскиот народ кон американските намери“, рече Багаи.
Тој додаде дека Иран ќе донесе каква било одлука за продолжување на преговорите во согласност со своите национални интереси.