Претседателот на Романија, Никушор Дан, денес изјави дека на седницата на Врховниот совет за одбрана на земјата е дадено позитивно мислење за привремено распоредување на американски сили и опрема во Романија, вклучувајќи авиони за полнење гориво во воздух и опрема за сателитска комуникација, нагласувајќи дека станува збор за одбранбени средства.
За да стапи на сила таа одлука, потребно е одобрение од романскиот парламент, според Digi24.
Според извештаите, американските сили и опрема би можеле да бидат распоредени во воздухопловните бази во окрузите Констанца и Клуж.
Заедно со опремата, треба да пристигнат помеѓу 400 и 500 припадници на американската армија одговорни за нејзиното функционирање.
Истите извори наведуваат дека распоредувањето би можело да биде одобрено за период од 90 дена, со можност за продолжување, што би барало нова постапка и повторно разгледување од страна на Врховниот совет за одбрана на земјата.
„Разговаравме за распоредување на одредени американски сили и опрема во Романија, меѓу кои се авиони за полнење гориво и опрема за сателитска комуникација. Нагласувам дека станува збор за одбранбена опрема. Ќе биде распоредена ако парламентот даде согласност. Ова се средства што ја зголемуваат безбедноста на Романија. Граѓаните немаат причина да се грижат“, рече Дан.
Тој рече дека Романија, заедно со своите европски партнери, се обидува да придонесе за завршување на конфликтот, кој има последици за романската економија, преку дипломатски и политички средства.
Според претходните информации од медиумите, Соединетите Американски Држави побарале одобрение за испраќање два авиони-цистерни за полнење гориво од воздух, како и помеѓу 100 и 300 војници одговорни за безбедноста и одржувањето на воздухопловите.
Одлуката за распоредување на странски воени сили на територијата на Романија подразбира посебна институционална постапка, која вклучува мислење на Врховниот совет за одбрана на земјата и одобрение од Парламентот.
Во моментов, околу 1.000 американски војници се распоредени во Романија во три бази.
Барањето на Вашингтон доаѓа во контекст на конфликтот на Блискиот Исток, каде што САД и Израел спроведуваат воени операции против Иран.