Романскиот претседател Никусор Дан свика состанок на Врховниот совет за одбрана за да разгледа дали да им се одобри пристап на САД до романските воени бази за поддршка на операциите поврзани со Техеран, соопштија политички извори.
На првиот состанок во годината, Советот ќе разговара за безбедносните последици од конфликтот на Блискиот Исток, неговото влијание врз романскиот енергетски пазар, како и за можноста за привремено распоредување воени капацитети на романска територија, објави Ројтерс.
Според изворите, барањето на Вашингтон се однесува на користење на воздухопловната база Михаил Когалничану.
Во меѓувреме, некои членки на Европската унија, како што се Франција, Грција и Италија, испратија воени бродови на Кипар откако беспилотни летала од иранско производство погодија британска воена база на островот, додека други земји дозволуваат користење на нивните воени објекти.
Околу 1.000 американски војници сè уште се распоредени во Романија, додека постојаното сојузничко присуство е околу 3.500 војници на НАТО, вклучувајќи ги и американските сили.
Романија дели копнена граница долга 650 километри со Украина, каде што за време на конфликтот руски беспилотни летала ја преминаа територијата кон Киев, додека мините во Црното Море влијаат на важните трговски и енергетски патишта, пренесува Танјуг.