Трри дена откако беше прогласен за наследник на неговиот убиен татко за врховен лидер на Иран, Моџтаба Хамнеи сè уште не се појавил јавно ниту дал никаква изјава.
Една причина е загриженоста за безбедноста дека секоја комуникација би можела да ја открие неговата локација, но друга, според тројца ирански функционери, е фактот дека 56-годишниот Хамнеи е повреден, пишува „Њујорк тајмс“.
Повреден во напад?
Иранските функционери, кои зборуваа под услов да останат анонимни, рекоа дека високи владини извори им потврдиле дека Хамнеи е повреден, вклучително и во нозете, но дека бил свесен и однесен на многу безбедна локација со ограничени комуникации.
Според нив, тој ги претрпел повредите на 28 февруари, истиот ден кога неговиот татко, ајатолахот Али Хамнеи, бил убиен во израелските воздушни напади врз комплексот за лидерство во центарот на Техеран.
Мајката, сопругата и синот на новиот врховен лидер и неколку високи ирански одбранбени функционери исто така биле убиени во тој напад.
Информацијата за повредата ја потврдиле двајца израелски воени функционери.
Тие велат дека разузнавачките информации собрани од Израел, исто така, укажуваат дека Хамнеи ги повредил нозете на 28 февруари.
Како што велат, до тој заклучок дошле дури и пред да биде избран за нов врховен лидер во неделата.
Околностите и точниот степен на повредите на Хамнеи сè уште не се познати.
Енигматска тишина
Една од индициите за состојбата на Хамнеи се појави на иранската државна телевизија и државната новинска агенција ИРНА, каде што беше наречен „ранет воен ветеран“.
Во честитката по повод неговото назначување, моќната владина религиозна добротворна организација Комитех Емдад, исто така, го нарекува „џанбаз џанг“, персиски термин за ветеран ранет во војна.
Кога Есмаил Багаеи, портпарол на иранското министерство за надворешни работи, беше прашан од локалните медиуми во вторник дали Хамнеи ја презел функцијата врховна религиозна и политичка личност и врховен командант на вооружените сили, тој избегна директен одговор.
„Оние кои треба да ја примат пораката, ја примиле“, рече Багаеи криптички.
Закани од Израел и САД
Во петокот, кога стана јасно дека Хамнеи е водечкиот кандидат за наследник, израелските воени авиони повторно нападнаа.
Тие користеа бомби за уништување бункери за да ги таргетираат преостанатите структури од канцеларијата и станбениот комплекс на врховниот лидер, срамнувајќи ги со земја, како што покажуваат сателитските снимки.
Иранските власти веруваат дека целта на тој напад бил Хамнеи, но дека тој не бил таму.
Израелскиот министер за одбрана Израел Кац објави на социјалните мрежи дека секој наследник на ајатолахот Хамнеи ќе биде цел.
Американскиот претседател Трамп рече дека не е задоволен од назначувањето на Хамнеи, но не сакаше да коментира дали САД планираат да се обидат да го убијат.
Култ на личноста и покрај отсуството
Моџтаба Хамнеи е инаку енигматична личност. Тој ретко, ако воопшто, држел говори или присуствувал на јавни настани.
Со години беше моќник во сенка со длабоки врски со Корпусот на исламската револуционерна гарда, координирајќи ги безбедносните и воените работи за канцеларијата на неговиот татко.
Малку се знае за неговата личност или плановите за управување со Иран.
Поради ова, иранските медиуми почнаа да прикажуваат кратко видео составено од негови фотографии и кратка биографија.
Иако е физички отсутен од јавноста, неговото лице веќе е прикажано на големи транспаренти низ главниот град Техеран, како и на џиновски мурал на кој е прикажан неговиот покоен татко како му го подава иранското знаме.
Во меѓувреме, поддржувачите на владата одржуваат церемонии на „положување заклетва“ за Хамнеи на градските плоштади низ целата земја, мавтајќи со знамиња и носејќи негови фотографии.