Полска секогаш ќе одговори соодветно и е подготвена да ја брани својата територија, изјави полскиот претседател Карол Навроцки за време на дебатата во Обединетите нации.
Во вторник, за време на 80-тото заседание на Генералното собрание на ОН во Њујорк, тој нагласи дека Варшава не се согласува со провокациите на Москва против Полска и другите европски земји.
Во своето обраќање, Навроцки истакна дека светот целосно се променил откако започна руската инвазија на Украина и дека државните граници повеќе не се неповредливи, „а меѓународното право стана сугестија, а не правило“, пренесува ПАП.
„Се наоѓаме на пресвртница во историјата – во време кога одлуките донесени денес ќе имаат последици со децении. Затоа сега, како заедница на демократски држави, мора да ја гледаме сегашната ситуација како бојно поле за принципите чие почитување може да ја одреди иднината на нашата цивилизација. (…) Верувам дека ова е последен момент да се преземе акција“, рече Навроцки, пренесува Танјуг.
Тој оцени дека руската агресија врз Украина не е конфликт од исклучиво регионален карактер, туку „тест дали принципите врз кои се темели ОН ќе го издржат тестот на времето или ќе се срушат под тежината на империјалните и колонијалните амбиции на држава која се смета себеси над законот и постојано ги игнорира резолуциите на Собранието на ОН“.
Тој потсети дека ноќта помеѓу 9 и 10 септември, руски беспилотни летала нападнаа територија на Полска, земја членка на НАТО.
„Десетина беспилотни летала намерно ги прекршија границите на мојата земја – и ве уверувам, не беше случајно – по наредба издадена во главниот град на земја која е постојана членка на Советот за безбедност. Како резултат на тоа, Полска беше принудена да отвори оган врз непријателски цели над нашата територија за прв пат по Втората светска војна“, рече полскиот претседател.
Тој изјави „како врховен командант на вооружените сили и претседател на Полска, дека Полска секогаш ќе реагира соодветно и е подготвена да ја брани својата територија“.
Навроцки, исто така, рече дека и други земји, вклучувајќи ги Естонија и Романија, доживеале слични провокации од Русија, како и дека Полска издвојува значителни средства за развој на своите одбранбени капацитети и делот од Европа каде што се наоѓа.