Околу 1.500 луѓе се евакуирани на грчкиот остров Крит поради пожар кој зафати ниска вегетација, јавија медиумите.
„Евакуацијата е спроведена во повеќе хотели, а туристите безбедно се префрлени во затворената гимназија во општината Јерапетра,“ на југoисточниот брег на Крит, изјави полицајниот службеник Јанис Андрулакис за телевизијата Мега.
Евакуацијата е направена превентивно поради недостаток на воздушна поддршка за време на ноќта.
„Поради силниот ветер, пожарот брзо се прошири на неколку локации,“ а моментално три се активни, рече Андрулакис.
Од утрината околу 270 пожарникари, со поддршка од 10 хеликоптери и дронови, работат на гаснење на пожарот недалеку од градот Јерапетра.