Заклучоците на Европскиот совет, до кои дојде Политико, ги повикуваат лидерите да извршат притисок врз Израел да ги почитува своите обврски за човекови права.
Заклучоците треба да бидат усвоени на крајот од дводневниот самит на Европската Унија, кој започна денес во Брисел.
ЕУ претходно презентираше наоди во кои се утврдува дека владата на Бенјамин Нетанјаху ги прекршила условите од договорот со ЕУ, наведувајќи го таргетирањето на болниците, убивањето цивили и недостатокот на пристап до хуманитарна помош во Појасот Газа.
„Европскиот совет го зема предвид тековниот преглед на усогласеноста на Израел со Член 2 од Договорот за асоцијација меѓу ЕУ и Израел и го поканува Советот да продолжи со дискусиите за ова во јули 2025 година, земајќи го предвид развојот на ситуацијата на терен“, се наведува во заклучоците.
Ирскиот премиер Мишел Мартин ја нагласи потребата од „поддршка на Палестинците и вршење притисок врз Израел“.
Тој додаде дека ревизијата на гореспоменатиот договор е „скромен документ“ и дека за луѓето во Европа е несфатливо што ЕУ не прави повеќе.
Словенечкиот премиер Роберт Голоб изјави дека веќе некое време ЕУ повеќе не може „да проповеда владеење на правото поради нашиот несоодветен одговор на злосторствата што се случуваат во Газа“.
Шпанскиот премиер Педро Санчез ги критикуваше своите европски колеги за „двојни стандарди“. Тој го пофали Европскиот совет за работата на 18-тиот пакет санкции против Русија, но го оцени пристапот како неповрзан, бидејќи нема планови за воведување санкции против Израел.
Шпанија, Ирска и Словенија беа меѓу деветте европски земји кои потпишаа писмо со кое ја повикуваат ЕУ да дејствува во врска со војната во Газа, пишува Политико.