Дванаесет лица се убиени, а 25 повредени во израелските напади во јужен Либан, објави Министерството за здравство во Бејрут.
Една од жртвите е дете.
Израелската војска првично не ги коментираше инцидентите, но подоцна на Телеграм соопшти дека Хезболах лансирал „неколку експлозивни дронови“ кон војниците во јужен Либан.
Израелската армија, исто така, објави дека пресретнала ракета насочена кон област во јужен Либан каде што дејствуваат израелски војници.
Медиумите известуваат дека четворица израелски војници се полесно повредени во јужен Либан и северен Израел.
Иако технички е на сила прекин на огнот, непријателствата меѓу Израел и милицијата Хезболах, поддржана од Иран, во Либан продолжуваат секојдневно.
Конфликтот повторно ескалираше по почетокот на војната со Иран.
Либанската армија и владата во Бејрут не се активни страни во конфликтот.
Со оглед на кревкото примирје, САД се залагаат за директни разговори меѓу Израел и Либан на највисоко ниво.
Американскиот претседател Доналд Трамп објави прекин на огнот кон средината на април по разговорите со израелскиот премиер Бенјамин Нетанјаху и либанскиот претседател Џозеф Аун, пренесува ДПА.