Денес, Иран претстави нова балистичка ракета со дострел до 1.200 километри, објавија државните медиуми, додека западните земји изразија загриженост во врска со тоа.
„Балистичката ракета на цврсто гориво „Гасем Басир“, со дострел од најмалку 1.200 километри, е најновото одбранбено достигнување на Иран“, објави иранската државна телевизија.
Западните земји се загрижени за напредокот на програмата за балистички ракети на Иран, кој веќе е обвинет за дестабилизација на Блискиот Исток, а чии ракетни капацитети го ставаат Израел, неговиот заколнат непријател, во дострел на оган.
Државната телевизија го емитуваше видеото од лансирањето на новата ракета за време на интервјуто со министерот за одбрана, генерал Азиз Насирзадех.
„Доколку бидеме нападнати и против нас биде покрената војна, ќе возвратиме насилно и ќе ги таргетираме нивните интереси и бази“, рече министерот.
Тој додаде дека Иран „не негува непријателство кон соседните земји, но американските бази се ирански цели“.
Претставувањето на новата ракета доаѓа во време кога Техеран и Вашингтон водат разговори со посредство на Оман од 12 април, први на тоа ниво откако САД се повлекоа од меѓународниот договор за ограничување на нуклеарната програма на Иран, постигнат три години претходно, во 2018 година, за време на првиот мандат на претседателот Доналд Трамп.
На почетокот на мај, американскиот државен секретар Марко Рубио во интервју за „Фокс њуз“ го повика Иран да „се откаже од изградбата на ракети со долг дострел кои немаат друга намена освен да поседуваат нуклеарно оружје“.
На 27 април, израелскиот премиер Бенјамин Нетанјаху повика на договор со Техеран што би „ги елиминирал капацитетите за збогатување ураниум на Иран“ и би го лишил Иран од балистички ракети.
Техеран отфрли какви било разговори со Вашингтон за своите воени и одбранбени капацитети, вклучително и за програмата за балистички ракети.
Трамп се закани дека ќе го бомбардира Иран ако дипломатијата не успее и воведе дополнителни санкции врз нафтениот сектор на Иран.
На почетокот на февруари, Иран претстави уште една балистичка ракета, со наводен дострел до 1.700 километри.